ଖୋର୍ଦ୍ଧା ଜିଲ୍ଲା ବାଣପୁର ବ୍ଲକର ବାଲେଡିହରୁ ମୁକ୍ତାଦେଇପୁର ପର୍ଯ୍ୟନ୍ତ ଦେଢ କିଲୋମିଟର ରାସ୍ତାର ଅବସ୍ଥା ବେଶ୍ ଶୋଚନୀୟ ହୋଇପଡିଛି।
ବାଣପୁର: LR NEWS( ବାସୁଦେବ ) ଖୋର୍ଦ୍ଧା ଜିଲ୍ଲା ବାଣପୁର ବ୍ଲକର ବାଲେଡିହରୁ ମୁକ୍ତାଦେଇପୁର ପର୍ଯ୍ୟନ୍ତ ଦେଢ କିଲୋମିଟର ରାସ୍ତାର ଅବସ୍ଥା ବେଶ୍ ଶୋଚନୀୟ ହୋଇପଡିଛି। ବର୍ଷା ଯୋଗୁଁ ରାସ୍ତା ଉପରେ ପାଣିଜମି ରହିବାଫଳରେ ଲୋକମାନେ ଯିବା ଆସିବା ଲାଗି ନାହିଁ ନଥିବାର ହଇରାଣ ହେଉଛନ୍ତି। ଏହି ରାସ୍ତାଉପରେ ବେଙ୍ଗରାଜପଲ୍ଲୀ, କୋସରଡା ପରି ତିନି ରୁ ଚାରିଖଣ୍ଡ ଗ୍ରାମ ନିର୍ଭର କରୁଥିବାବେଳେ ମୁଖ୍ୟ ରାସ୍ତାଟିର ଅବସ୍ଥା ବିପଜ୍ଜନକରହିଛି। ଏହି ରାସ୍ତା ଉପରେ ପ୍ରାୟ ୧୦୦୦ ରୁ ଉର୍ଦ୍ଧ୍ଵ ଲୋକ ନିର୍ଭରଶୀଳ ରହିଥିବାବେଳେ ଏହି ରାସ୍ତାର ଅବସ୍ଥା ବେଶ୍ ସାଂଘାତିକ ରହିଛି।
ଗତବର୍ଷ ଏକ ସୁନାମଧନ୍ୟ କଣ୍ଟ୍ରାକ୍ଟର ଏହି ରାସ୍ତା କାମ ଆରମ୍ଭ କରିଥିବାବେଳେ ଅଧାରୁ ରାସ୍ତା କାମ ବନ୍ଦ କରିଦେଇଥିଲେ। ଯାହାଫଳରେ ଟିକିଏ ବର୍ଷା ହେଲେ ଏହି ରାସ୍ତାରେ ଆଣ୍ଠୁଏ ଉଚ୍ଚର ପାଣି ଜମି ରହୁଥିବାବେଳେ ରାସ୍ତା ସାରା ଖାଲ ଖମାରେ ପରିପୂର୍ଣ୍ଣ ହୋଇଛି। ଅପରପକ୍ଷରେ ସେହି ଅଞ୍ଚଳର କିଛି ଅସାମାଜିକ ଯୁବକ ଏହି ରାସ୍ତା ଉପରେ ମଳତ୍ୟାଗ କରୁଥିବାର ଅଭିଯୋଗ ହେଉଛି। ସ୍ଥାନୀୟ ଲୋକମାନେ ଏହି ଅସାମାଜିକ ଯୁବକଙ୍କୁ ଏନେଇ ତାଗିଦା କରିବାବେଳେ ସମ୍ପୃକ୍ତ ଯୁବକମାନେ ସ୍ଥାନୀୟବାସୀଙ୍କୁ ଧମକ ଦେଉଛନ୍ତି। ଅପରପକ୍ଷରେ ସ୍ଥାନୀୟ ଯୁବକମାନେ ନିଜ ଉଦ୍ୟମରେ ରାସ୍ତାରେ ବାଲି ପକାଉଥିଲେ ମଧ୍ୟ ଏହା କୌଣସି କାର୍ଯ୍ୟ ଦେଉନାହିଁ। ବର୍ଷା ଯୋଗୁଁ ରାସ୍ତା ପୂର୍ବବତ୍ ହୋଇଯାଉଛି।
ଠିକ ସେହିପରି ଏହି ରାସ୍ତା ଆରମ୍ଭରୁ ନାରଣପୁର ଗ୍ରାମ ଦେଇ ବାଣପୁର ଯାଉଥିବା ରାସ୍ତା ମଧ୍ୟ ଆହୁରି ଅଧିକ କଦର୍ଯ୍ୟ ହୋଇପଡିଛି। ଦୀପ ତଳ ଅନ୍ଧାର ପରି ବାଣପୁର ଠାରୁ ମାତ୍ର ଦୁଇ କିଲୋ ମିଟର ଦୂରରେ ରହିଥିବା ଏହି ପ୍ରମୁଖ ରାସ୍ତା ପ୍ରତି ପ୍ରଶାସନ କିମ୍ବା ବିଧାୟକ ଧ୍ୟାନ ନ ଦେବା ଏକ ଦୁର୍ଭାଗ୍ୟର ବିଷୟ।
ତେବେ ରାସ୍ତା କାମ ଅଧାରୁ ବନ୍ଦ କରାଯାଇ ଲୋକଙ୍କୁ କାହିଁ ହଇରାଣ ହରକତ କରାଯାଉଛି ବୋଲି ସାଧାରଣରେ ପ୍ରଶ୍ନଉଠୁଛି। ଅପରପକ୍ଷରେ ବାଣପୁର ବ୍ଲକର ସୁରକ୍ଷା ପାଇଁ ରାତିଅଧିଆ ପାଚେରୀ କାର୍ଯ୍ୟ ହେଇପାରୁଥିବାବେଳେ ପ୍ରାୟ ୧୦୦୦ ରୁ ଊର୍ଦ୍ଧ୍ଵ ଲୋକ ନିର୍ଭରଶୀଳ ରହିଥିବା ଏକ ରାସ୍ତା କାମ କ’ଣ ପାଇଁ କରାଯାଉନାହିଁ ବୋଲି ପ୍ରଶ୍ନ କରିଛନ୍ତି ସାଧାରଣ ଲୋକେ। ସମ୍ପ୍ରତି କରୋନା ସମୟରେ ସ୍ବଚ୍ଛ ଓ ପରିଷ୍କାର ରହିବା ନିତାନ୍ତ ଆବଶ୍ୟକତା ହୋଇଥିବାବେଳେ ଏପରି ଏକ କଦର୍ଯ୍ୟ ରାସ୍ତାରେ ଲୋକମାନେ କିପରି ସ୍ବଚ୍ଛ ଓ ପରିଷ୍କାର ରହିପାରିବେ ତାହା ଆଉ ଏକ ପ୍ରଶ୍ନ। ଏହି ରାସ୍ତାର ନିର୍ମାଣ କାର୍ଯ୍ୟ ଯଥାଶୀଘ୍ର ଆରମ୍ଭ କରାଯିବା ନେଇ ସାଧାରଣରେ ଦାବି କରାଯାଇଛି।
ନିକଟରେ ଚିଲିକା ବିଧାୟକ ନିଜ କାର୍ଯ୍ୟର ବିବରଣୀ ପ୍ରଦାନ କରିବା ସହ ସମ୍ପୃକ୍ତ ଅଞ୍ଚଳର ଉନ୍ନୟନ ମୂଳକ କାର୍ଯ୍ୟ ପାଇଁ ହଜାରକୋଟି ଟଙ୍କାର ନିର୍ମାଣ କାର୍ଯ୍ୟ ସମ୍ପର୍କରେ ସୂଚନା ଦେଇଥିଲେ। ତେବେ ଏହି ରାସ୍ତା ପ୍ରତି ବିଧାୟକଙ୍କ କିପରି ଦୃଷ୍ଟିଗୋଚର ହେଉ ନାହିଁ ତାହା ଏବେ ପ୍ରଶ୍ନର ବିଷୟ ପାଲଟିଛି। ଚିଲିକା ବିଧାୟକ ବିକାଶକୁ ଅଗ୍ରାଧିକାର ଦେଉଥିବାବେଳେ ସେହି ଅଞ୍ଚଳର ଏକ ପ୍ରମୁଖ ରାସ୍ତାର ଅବସ୍ଥା ପ୍ରତି ଧ୍ୟାନ ଦେବା ଅତ୍ୟନ୍ତ ଆବଶ୍ୟକ ହୋଇପଡିଛି।