ଗଂଜାମ (ଟୁକୁନା ପ୍ରଧାନ ୧୩. ୦୫. ୨୦୨୦ ) – : ଗଞ୍ଜାମ ଜିଲ୍ଲା ଜଗନ୍ନାଥ ପ୍ରସାଦ ବ୍ଲକ ଅଳସୁ ଗ୍ରାମ ର ଖଇରଝୋଳ ରେ ଭୟାଭୟ ଅଗ୍ନିକାଣ୍ଡ ଘଟିଛି । ଆଖି ପିଛୁଳାକେ ଘର କୁ ଘର ନିଆଁ ଲାଗି ପ୍ରାୟ ୧୨ ଟି ପରିବାରର ୧୪ ବଖରା ଘର ପୋଡି ଭସ୍ମୀଭୂତ ହୋଇଥିବା ସୂଚନା ମିଳିଛି । ଖବର ପାଇ ଦମକଳ ବାହିନୀ ଘଟଣାସ୍ଥଳରେ ପହଂଚିଲା ବେଳକୁ ୧୪ ବଖରା ସମେତ ବହୁ ମୂଲ୍ୟବାନ ଆସବାପତ୍ର ପୋଡି ପାଉଁଶ ହୋଇଥିବା ବେଳେ ଲକ୍ଷାଧିକ ଟଙ୍କାର ସମ୍ପତି ନଷ୍ଟ ହୋଇଯାଇଛି । ସୂଚନା ପ୍ରକାରେ ଗତକାଲି ସନ୍ଧ୍ୟା ସମୟରେ ରୋଷଇ ଘରୁ ଅଗ୍ନିକାଣ୍ଡ ଘଟିଥିବା ଦୃଶ୍ୟ ସାହି ଲୋକ ଦେଖିବାକୁ ପାଇଥିଲେ । ସଙ୍ଗେ ସଙ୍ଗେ ଦମକଳ ବିଭାଗଙ୍କୁ ଖବର ଦେଇ ଗାଁ ଲୋକ ମାନେ ନିଆଁକୁ ଆୟତ୍ତ କରିବାକୁ ଚେଷ୍ଟା କରିଥିଲେ କିନ୍ତୁ ନିଆଁ ଏତେ ଭୟଙ୍କର ଥିଲା ଯେ ଦେଖୁଦେଖୁ ସବୁ ପୋଡି ପାଉଁଶ ହୋଇଗଲା । ଜଗନ୍ନାଥ ପ୍ରସାଦ ଦମକଳ ବାହିନୀ ଘଟଣାସ୍ଥଳରେ ପହଁଚି ନିଆଁ ଲିଭାଇଥିଲେ । ଖବର ପାଇ ସ୍ଥାନୀୟ ଅତିରିକ୍ତ ତହସିଲଦାର ଘଟଣା ସ୍ଥଳରେ ପହଂଚି କ୍ଷୟକ୍ଷତିର ଆକଳନ କରି ଫେରି ଯାଇଛନ୍ତି । ସ୍ଥାନୀୟ ସରପଞ୍ଚ ସମସ୍ତ ଙ୍କୁ ରନ୍ଧା ଖାଦ୍ୟ ଯୋଗାଇଥିବା ଜଣାଯାଇଛି । କ୍ଷତିଗ୍ରସ୍ତ ପରିବାରକୁ ସରକାରୀ ସହାୟତା ପ୍ରଦାନ କରିବା ପାଇଁ ସ୍ଥାନୀୟ ଲୋକ ଦାବି କରିଛନ୍ତି ।
