ଗଞ୍ଜାମ , ( ଟୁକୁନା ପ୍ରଧାନ , ୦୬.୦୨.୨୦୨୦) – :ପରମ୍ପରାକୁ ବେଖାତିର କରି ବିଭିନ୍ନ ସ୍ଥାନରେ ଅଦିନରେ ହେଉଛି ରଥଯାତ୍ରା। ଗତ ଗୁରୁବାର ମୁମ୍ବାଇରେ ଇସ୍କନ ପକ୍ଷରୁ ଅସମୟରେ ରଥଯାତ୍ରା କରାଯାଇଥିବାରୁ ଏହାକୁ ନେଇ ପ୍ରତିକ୍ରିୟା ତୀବ୍ର ହେବାରେ ଲାଗିଛି। ଏହା ଶ୍ରୀଜଗନ୍ନାଥ ସଂସ୍କୃତି ଏବଂ ମହାପ୍ରଭୁଙ୍କ ପ୍ରତି ଅପମାନ ବୋଲି କହି ପୁରୀରେ ଏହାକୁ ଘୋର ବିରୋଧ କରାଯାଇଛି। ବାରମ୍ବାର ଇସ୍କନ ଏଭଳି ଆଚରଣ ଦେଖାଇ ବିଧି, ପରମ୍ପରାକୁ ମାନୁ ନ ଥିବାରୁ ଶ୍ରୀମନ୍ଦିର ସେବାୟତ, ଭକ୍ତ, ବୁଦ୍ଧିଜୀବୀ, ଗବେଷକ ତୀବ୍ର ପ୍ରତିବାଦ କରିଛନ୍ତି। ତେଣୁ ଶ୍ରୀମନ୍ଦିର ପରିଚାଳନା କମିଟି ବୈଠକରେ ମଧ୍ୟ ଏ ପ୍ରସଙ୍ଗ ଉଠିଛି। ସଦସ୍ୟମାନଙ୍କ ମଧ୍ୟରେ ଏ ନେଇ ଉଦ୍ବେଗ ପ୍ରକାଶ ପାଇଥିବାବେଳେ ଗଜପତି ମହାରାଜା ଦିବ୍ୟସିଂହ ଦେବ
ଏ ନେଇ ଇସ୍କନ ମୁଖ୍ୟଙ୍କୁ ଚିଠି ଲେଖି ଅବଗତ କରାଇବେ ବୋଲି ନିଷ୍ପତ୍ତି ହୋଇଛି। ଆଗାମୀ ଦିନରେ ଅଦିନରେ ରେ ରଥଯାତ୍ରା ନ କରିବାକୁ ଚିଠିରେ ଦର୍ଶାଯିବ। ସେହିପରି ଏ ଦିଗରେ ପଦକ୍ଷେପ ନେବାକୁ ରାଜ୍ୟ ସରକାରଙ୍କୁ ଶ୍ରୀମନ୍ଦିର ପ୍ରଶାସନ ଅନୁରୋଧ କରିବ ବୋଲି ଗଜପତି ମହାରାଜା ଦିବ୍ୟସିଂହ ଦେବଙ୍କ ଅଧ୍ୟକ୍ଷତାରେ ଗତକାଲି ଅନୁଷ୍ଠିତ ବୈଠକରେ ନିଷ୍ପତ୍ତି ନିଆଯାଇଛି ।
ଏ ସମ୍ପର୍କରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଡ. କ୍ରିଷନ କୁମାର କହିଛନ୍ତି, ଅଦିନିଆ ରଥଯାତ୍ରାକୁ ନେଇ ପୂର୍ବରୁ ଇସ୍କନର କେତେକ ପ୍ରତିନିଧିଙ୍କ ସହ ଆଲୋଚନା ହୋଇଥିଲା। ଏଥିରେ ଇସ୍କନର ବରିଷ୍ଠ ନେତୃ ବୃନ୍ଦ ମାନେ ଯୋଗଦେଇଥିଲେ । ଆସନ୍ତା ଏପ୍ରିଲରେ ମାୟାପୁରରେ ହେବାକୁ ଥିବା ଇସ୍କନ ପରିଚାଳନା ପରିଷଦ ବୈଠକରେ ଏହି ପ୍ରସଙ୍ଗ ଉପସ୍ଥାପନ କରାଯିବ ବୋଲି ସେମାନେ କହିଥିଲେ । ପୂର୍ବରୁ ମଧ୍ୟ ଲୁଧିଆନାରେ ଅଦିନରେ ରଥଯାତ୍ରା ଆୟୋଜନ ଲାଗି ଇସ୍କନ ନିଷ୍ପତ୍ତି ନେଇଥିଲା। ମାତ୍ର ପରେ ଏଥିରୁ ଓହରିଯାଇଥିଲା। କିନ୍ତୁ ନିକଟରେ ମୁମ୍ବାଇରେ ଇସ୍କନ ପକ୍ଷରୁ ରଥଯାତ୍ରା କରାଯାଇଛି । ମହାପ୍ରଭୁଙ୍କର ଯେଉଁ ପରମ୍ପରା ରହିଛି ସେହି ଅନୁସାରେ ରଥଯାତ୍ରା ହେବା କଥା। ବିଶେଷକରି ହିନ୍ଦୁ ଧର୍ମ ଏବଂ ଜଗନ୍ନାଥ ସଂସ୍କୃତି ଓ ପରମ୍ପରାକୁ ବଜାୟ ରଖିବା ଲାଗି ସମସ୍ତେ ଉଦ୍ୟମ କରିବା ଦରକାର। ମୁମ୍ବାଇରେ ରଥଯାତ୍ରା ଅନୁଷ୍ଠିତ ହେବା ନେଇ ଇସ୍କନ ଅଧିକାରୀଙ୍କ ସହ ଆଲୋଚନା କରାଯାଇଛି। ତଥାପି ଗଜପତି ମହାରାଜା ନିଜେ ଇସ୍କନ ମୁଖ୍ୟଙ୍କୁ ଚିଠି ଲେଖି ଜଣାଇବେ। ଆଗକୁ ଅଦିନରେ ରଥଯାତ୍ରା ନ କରିବାକୁ ଏଥିରେ ଉଲ୍ଲେଖ କରାଯିବ । ଏଥିସହ ରାଜ୍ୟ ସରକାର ମଧ୍ୟ ସେମାନଙ୍କୁ ଜଣାଇବା ଲାଗି ଶ୍ରୀମନ୍ଦିର ପ୍ରଶାସନ ପକ୍ଷରୁ ଅନୁରୋଧ କରାଯିବ । ଏପ୍ରିଲରେ ଇସ୍କନ ବୈଠକରେ ସକାରାତ୍ମକ ନିଷ୍ପତ୍ତି ହେବା ନେଇ ଆଶା ରଖିଛୁ ବୋଲି ମୁଖ୍ୟ ପ୍ରଶାସକ ପ୍ରକାଶ କରିଛନ୍ତି।
ସୂଚନାଥାଉ କି, ଅଦିନିଆ ରଥଯାତ୍ରାକୁ ନେଇ ଗତବର୍ଷ ସେପ୍ଟେମ୍ବର ୬ରେ ଅନୁଷ୍ଠିତ ଶ୍ରୀମନ୍ଦିର ପରିଚାଳନା କମିଟି ବୈଠକରେ ବିସ୍ତୃତ ଭାବେ ଆଲୋଚନା ହୋଇଥିଲା। ପୁରୀରେ ଯେଉଁଭଳି ବିଧି ଓ ପରମ୍ପରା ଅନୁସାରେ କରାଯାଉଛି ଅଧିକାଂଶ ସ୍ଥାନରେ ବିଧି ମୁତାବକ ହେଉନାହିଁ । ତେଣୁ ରାଜ୍ୟ ସରକାରଙ୍କ ସହଯୋଗରେ ରଥଯାତ୍ରର ବିଧି ବିଶ୍ୱବାସୀଙ୍କୁ ଜଣାଯିବା ଲାଗି ନିଷ୍ପତ୍ତି ନିଆଯାଇଥିଲା। ଏହାସତ୍ତ୍ବେ କେତେକ ଅନୁଷ୍ଠାନ ଏହାକୁ ବେଖାତିର କରୁଛନ୍ତି । ଗତବର୍ଷ ନଭେମ୍ବରରେ ଇସ୍କନ ପଞ୍ଜାବ ଲୁଧିଆନାରେ ରଥଯାତ୍ରା କରିବା ଲାଗି ନିଷ୍ପତ୍ତି ନେଇଥିଲା। ସେହିପରି ଉତ୍ତରପ୍ରଦେଶର ଗାଜିଆବାଦସ୍ଥିତ ଶ୍ରୀମଦ୍ ନାରଦୀୟ ଭାଗବତ ନିକୁଞ୍ଜ ଟ୍ରଷ୍ଟ ଗତବର୍ଷ ଡିସେମ୍ବର ୨୯ରେ ରଥଯାତ୍ରା ଆୟୋଜନ ଲାଗି ନିମନ୍ତ୍ରଣପତ୍ର ବାଣ୍ଟି ସାରିଥିଲା । ମାତ୍ର ତୀବ୍ର ବିରୋଧ ଏବଂ ଥାନାରେ ଏତଲା ଦିଆଯିବା ପରେ ଉଭୟେ ସେମାନଙ୍କ ନିଷ୍ପତ୍ତିରୁ ଓହରିଥିଲାବେଳେ ଗତ ଗୁରୁବାର ଇସ୍କନ ପକ୍ଷରୁ ମୁମ୍ବାଇରେ ରଥଯାତ୍ରା କରାଯାଇଥିଲା।