ଖୋର୍ଦ୍ଧା (LR NEWS,୮।୪): ରାଜ୍ୟରେ କରୋନା ଭୂତାଣୁ ସଂକ୍ରମଣ ସଖ୍ୟା ୪୨ରେ ପହଞ୍ଚିଛି। ଏ ନେଇ ଖୋର୍ଦ୍ଧା ଜିଲା ପ୍ରଶାସନ ପକ୍ଷରୁ ତତ୍ପରତା ପ୍ରକାଶ ପାଇଛି। କୋଭିଡ-୧୯ ସଂକ୍ରମଣ ନିୟନ୍ତ୍ରଣ ପାଇଁ ଜିଲା ପ୍ରଶାସନ ପକ୍ଷରୁ ସତର୍କତା ଅବଲମ୍ବନ କରାଯାଇଛି। ଏହାର କାର୍ଯ୍ୟକୁ ବ୍ୟାପକ କରିବା ଲାଗି ପ୍ରଶାସନ ପକ୍ଷରୁ ରାପିଡ୍ ରେସପନ୍ସ ଟିମ(ଆରଆରଟି) ଗଠନ କରାଯିବ ବୋଲି ଜିଲାପାଳ ଶିତାଂଶୁ କୁମାର ରାଉତ କହିଛନ୍ତି ।
ପ୍ରତି ପଞ୍ଚାୟତ ଓ ୱାର୍ଡ ସ୍ତରରେ ଟିମ୍ ଗଠନ କରାଯିବ। ଏଥିସହିତ ଏନ୍ଏସ୍ଏସ,ଏନ୍ସିସି, ଭାରତ ସ୍କାଉଟ ଏଣ୍ଡ ଗାଇଡ, ସ୍ବେଚ୍ଛାସେବୀ ଅନୁଷ୍ଠାନ, ବିଜୁ ଯୁବ ବାହିନୀ ପ୍ରଭୃତି ଅନୁଷ୍ଠାନର ସ୍ବେଚ୍ଛାସେବୀଙ୍କୁ ଏଥିରେ ସାମିଲ କରିବା ଲାଗି ନିର୍ଦ୍ଦେଶ ଦିଆଯାଇଛି।
ତୁରନ୍ତ ଏହାକୁ କାର୍ଯ୍ୟକାରୀ କରିବା ଲାଗି ଖୋର୍ଦ୍ଧା ଉପଜିଲାପାଳ, ସମସ୍ତ ବିଡିଓଙ୍କୁ ନିର୍ଦ୍ଦେଶ ଦିଆଯାଇଛି।
ଏହି ଟିମ୍ ସଦସ୍ୟଙ୍କୁନେଇ ହ୍ବାଟ୍ସ୍ ଆପ୍ ଗ୍ରୁପ୍ କରାଯିବ। ଏହି ଟିମ୍ ନିଜ ଅଞ୍ଚଳର ସମସ୍ତ ଖବର ଉପରେ ନଜର ରଖିବେ। ପ୍ରତି ସମୟର ଟିକିନିଖି ଡାଟା ପ୍ରଶାସନିକ ଅଧିକାରୀଙ୍କୁ ପ୍ରଦାନ କରିବେ। ପ୍ରତି ପଞ୍ଚାୟତ ସ୍ତରରୁ ଆସୁଥିବା ଖବର ଉପରେ ବ୍ଲକ, ଉପ ଜିଲାପାଳ ଏବଂ ଜିଲାସ୍ତରୀୟ ଅଧିକାରୀମାନେ ଏହାକୁ ଯାଞ୍ଚକରି ବିହିତ ପଦକ୍ଷେପ ଗ୍ରହଣ କରିବେ। ଜିଲାପାଳ ରାଉତ କୁହନ୍ତି, ଏହି ଟିମ୍ ପଞ୍ଚାୟତରେ ଥିବା ବିଦେଶ, ବାହର ରାଜ୍ୟ ଫେରନ୍ତାଙ୍କ ଉପରେ ନଜର ରଖିବେ। ହୋମ୍ କ୍ବାରାଣ୍ଟାଇନ୍ରେ ରହିଥିବା ପରିବାର, ବ୍ୟକ୍ତିଙ୍କ ନିୟମିତ ଯୋଗାଯୋଗ, ଦାଦନ ଶ୍ରମିକ, ଗରିବ ଅସହାୟଙ୍କ ତାଲିକା, ନିଜ ଅଞ୍ଚଳର ସାନିଟାଇଜର, ସ୍ବଚ୍ଛତା, ପରିମଳ ଆଦି ଉପରେ ଦୃଷ୍ଟି ଦେବେ। ଦୀର୍ଘ ଦିନ ଧରି ଥଣ୍ଡା କାଶ ଜ୍ବରରେ ପୀଡିତ ବ୍ୟକ୍ତିଙ୍କ ସମ୍ପର୍କରେ ଖବର ସଂଗ୍ରହକରି ପ୍ରଶାସନିକ ଅଧିକାରୀଙ୍କୁ ଜଣାଇବା କାର୍ଯ୍ୟ କରିବେ।